柑．路

數三聲 (給神經緊張的你)
歌手：林一峰 | 作曲：Chet Lam
填詞：Chet Lam | 編曲：Chet Lam

失憶失聲失戀失態怕失去樂趣
各有性格各有問題覺得極疲累
要這要那奢望太多慨嘆無伴侶
數三聲　鬆口氣　揮之則去

找東找西找點安慰再找晦氣
怕老怕痛怕太肉麻怕奄悶怕死
死忍死衝死做結果死火還是你
數三聲　死不了　不必生氣

無陽光　送車尾　壞天氣　不可以避
無人能明白你的身心有多累
皺著眉怨著誰你會老幾歲

心急心嗡心灰心碎快交惡運了
切記教訓太肚餓時腦筋亦廢掉
緊張抑鬱操心過度快要淪陷了
數三聲　笑一笑　細胞沒有減少
世界繼續壞　你要繼續捱
但你會有力量　數三聲　即管笑
當你懂得笑　當你懂得笑　當你懂得笑

=====

今晚我感覺比聶海勝和費俊龍上太空更加良好，在這裡要再一次多謝林萍萍小姐的樂天性格，幫我解決左好多問題，我一定會請你食飯！

咩都唔諗就係王道！控制唔到既野，唔關我事！唔好煩我！多謝！

我唔係港男，唔使俾人評頭品足！我唔係舞男，唔使出賣尊嚴！我就係我！I am who I am！(呢句要好小心咁用，唔係會好大鑊！)

因此，哈哈哈，1，2，3，數三聲，鬆口氣，揮之則去！

=====

今晚同阿傑撐枱腳，果間大角咀新發茶餐廳，烏蠅多過客！我叫左個「XO醬炒牛河」，D油成條大運河咁，真係用百九幾張索油紙都索唔晒！而且仲要我食一啖，D烏蠅又落黎食一啖。最後嬲得我用D辣醬掩沒一隻烏蠅，點知佢地十足《帝國反擊戰》咁，係咁攻擊我！阿傑仲疑似吹左隻烏蠅入我口，搞到我喉嚨好唔自在。

返到教會，週四課程。其實我對牧師都無咩野，我都仲係好敬愛呢位牧者既。雖然早兩日我嘈得咁緊要，但係都係對事唔對人。堂課由七點半上到九點半，之前牧師又應承我地九點完，又係老點。不過算啦，都學到野既，佢老人家既資料好充足。不過我做教書呢行就明白佢響教學上犯左乜野錯誤，就係講得太多資料，離晒題。算啦，佢係牧師，唔係老師，我唔會要求咁多野。

完左就返屋企，同阿傑又傾左陣。上到地鐵就約阿女聽朝去睇Batman。佢兩個細路真係好Kai，Kai得好可愛，可愛到好Kai。期待聽日既Batman，因為咁多個英雄裡面，我都幾鍾意Batman既人設。原因好簡單，因為全部都係心理變態，哈哈哈哈！最啱大人同細路哥！

蝙蝠俠︰以暴易暴，洗腳唔抹腳
羅賓︰我一直都覺得佢同蝙蝠俠係有D斷背，而且幾廿歲仲著短褲，又要現袋化，真係該煨
小丑︰極度暴力傾向，而且又癲又喪
雙面人︰極度無主見，乜都要擲毫決定
企鵝︰都唔使講，本身已經係畸型
貓女︰一個女人以為自己係隻貓，著皮衣玩皮鞭，十分SM
謎妖︰懶高深，問人地爛Gag IQ題，冬甩既爸爸係邊個呀？多啦A夢囉！
葛咸城市長︰又係一個同蝙蝠俠有路既人，膽小無主見，有乜事就吹雞

就係因為個個都變態，真係啱晒我既胃口。萬二分期待陳冠希既演出！